Се одржа научната конференција „Станушина – неоткриена македонска винска приказна“

Се одржа научната конференција „Станушина – неоткриена македонска винска приказна“

 

Земјоделскиот институт – Скопје денеска ја организираше првата научна конференција посветена на македонската автохтона винска сорта „Станушина“.

На конференцијата насловена „Станушина – неоткриена македонска винска приказна“ присуствуваа претставници од винарскиот и лозарскиот сектор, од дипломатскиот кор, од УКИМ и од Министерството за земјоделство, шумарство и водостопанство, како и други засегнати лица и организации.

Настанот го отвори директорот на Институтот, Виктор Ѓамовски, а обраќање имаше и ректорот на УКИМ, Никола Јанкуловски.

Гостин на конференцијата беше и агрономот Станислав Кочутар од Марибор, кој е чувар заштитник на 400-годишната словенечка винова лоза од Гинисовата книга на рекорди што вчера беше засадена и во дворот на Институтот.

За автохтоноста низ симболика зборуваше професорката Билјана Ристовска – Јосифовска од Институтот за национална историја.

Станушина е автохтона македонска сорта која потекнува од Тиквешкото виногорје. Во минатото била основна за производство на далеку познатите црвени тиквешки вина, но со воведување нови меѓународни сорти грозје, биле загрозени нејзината егзистенција и зачувување.

-Токму и целта на оваа конференција беше да придонесеме за нејзина поголема промоција и афирмација. Виното од оваа сорта е автентично, со средно тело со изразена свежина, среден интензитет на боја и широк спектар на ароми кои потсетуваат на малина, дренка, вишна, калинка, јагода… Логото на етикетата е со силна симболика на глаголицата како прво словенско писмо и словото С. „А во виното е вистината како што е и во зборот и во мислата“, велат од Земјоделскиот институт и додаваат дека целта на конференцијата беше јавноста да се информира за биолошката, историската и еколошката вредност на станушината, како и да се анимира лозарскиот и винарскиот сектор за производство на грозјето и виното.

Потенцирано беше и развивањето на јавни политики за зачувување и развој на автохтоните сорти, кои се услов за развој на биодиверзитетот и животната средина во земјава.

 

Категории: Вести, Слајдер

Слични Новости