(Интервју) Во потрага по нови вкусни предизвици – „Љубовна Куќичка“ вкусно ќоше скриено во срцето на Скопје
Преглед
Скитајќи низ Скопје во потрага по нови вкусни предизвици, пристигнавме до едно симпатично мало бистро токму во срцето на градот, на „Ленинова“. Симпатично мало бистро, полно со душа. Уште на самиот влез ве пречекува љубезната насмевка на персоналот, и ве пленува симпатичното хипстерско опкружување. Фино уреден локал , проткајан со мотиви од графити културата и мени полно со слатки здрави задоволства. Прво се најадовме со очите, потоа дегустиравме и дел од асортиманот на нашите домаќини. Местото има и симпатичен назив – „Љубовна Куќичка“. Разговаравме со сопственикот на локалот, скопски лик, меѓу скопјани познат едноставно како Пиги.
МФ: Кафуле не сте, не сте ни лаунџ бар – како би ја опишале Љубовна Куќичка? Кој е концептот на функционирање?
„Најблиско нешто со што можеме да се идентификуваме е бистро. Бистро се води законски, инаку не би знаел како точно да го дефинирам“.
МФ: Дали можеби, кога веќе бараме точна дефиниција, бистро за здрава храна би било најсоодветен опис?
„Па видете, нашиот концепт не е сосема таков. Не ја делиме така храната. Во нашето мени имаме и јајца, и ладни сендвичи, не е 100% здрава храна. Филозофијата ни е дека секој сам треба да знае да јаде умерено. Ние не сме тие кои одлучуваме дека треба да се отстранат некои работи со кои сме се хранеле уште од деца, напротив! Моментално е актуелен глутенот, во ред, ако ти забранил доктор – не го јади, меѓутоа тие поделби ги нема во нашето мени. Едноставно не ја делиме така храната.
МФ: Само што влеговме во локалот, забележавме многу убави моменти за око. Што се може да се најде на вашето мени?
„Па како што напоменав, кај нас нема здрава и нездрава храна. Имаме и салати, имаме и протеински ствари за вежбачи, имаме благи кои се без шеќер, а меѓу нив имаме и протеински благи збогатени со растителни протеини, комплетно вегански.
МФ: Ајде нешто околу името, приемчиво е и симпатично. Зошто баш Љубовна Куќичка?
„Едноставно е, ова што го работиме го работиме со љубов! На денешниот човек му фали многу љубов, а ние храната ја приготвуваме со многу љубов и им ја сервираме на клиентите. На тој начин, некако индиректно, им сервираме љубов на самата маса“.
МФ: Интересно, локал во кој се сервира љубов, а љубовта велат ја исцелува и душата и телото. Кога некој го сака тоа што го работи, тоа не може да остане незабележано и од другите. Во вашиот локал го има токму тоа, убава вибрација.
„Ние функционираме баш на таа фрекфенција. Уживаме во она што го подготвуваме, за и нашите клиенти да уживаат кога ги консумираат нашите производи. Тоа ни е основниот мотив кој нѐ води. Но, не само тоа! Сакаме да ги инспирираме клиентите да запазат на својата исхрана. Да вметнат, барем 2-3 пати неделно по некој нутритивен оброк, да не бидат само празни калории во прашање. Од оброците секогаш ја потенцираме важноста на појадокот. Наш фаворит е чиа семето т.е. чиа пудинзите кои се богати со амино киселини и придонесуваат за подобро варење и подобрена стомачна активност во текот на целиот ден. Зошто некое дете би јадело наутро некои слатки полни со шеќер, кога вака може да има вкусен и здрав појадок на база на јатки и урми, без додатоци од рафинирани шеќери!?
МФ: Освен што се занимавате со угостителство, односно правите оброци и десерти на база на природни состојки, дали можеби вие самите произведувате некои од состојките? Поправете нѐ ако грешиме – имаме слушнато дека сами произведувате путер од кикиритки, точно ли е тоа?
„Не само што е точно, туку тоа е само дел од асортиманот. Имаме наша линија на производи, сите на природна база, без никакви вештачки додатоци. Во моментов имаме наше лично производство на путер од кикиритки, путер од лешник и путер од бадем. Моментално застапени се само во нашиот локал, со тенденции да опфатиме и поширок пазар“.
МФ: Сведоци сме на помодарството кое го тресе и нашиов град кога е во прашање храната. Безглутенска исхрана, хроно исхрана, исхрана без јаглехидрати… и насекаде никнуваат мали локалчиња со некои специфични главни менија, со состојки за кои прв пат слушаме. Дали сметате дека и Љубовна Куќичка го следи тој тренд, или не се ставате во таа категорија на угостителски објекти?
„Како што напоменавме, не се натпреваруваме да имаме некое којзнае колку уникатно мени. Имаме и салати, имаме и сендвичи, имаме и по некој интегрален тост… Не чувствуваме потреба да ги следиме тие трендови и да се натпреваруваме со конкуренцијата. Здравје, понатаму планираме да го прошириме бизнисот. Наскоро отвараме уште еден локал во населба Аеродром. Тука можеби ќе претрпи некои мали промени менито, т.е. ќе додадеме некои здрави супи. Планирано е секој ден да има супа на денот, каде што ќе ротираат неколку здрави и вкусни супи – од тиква, од брокула и слично. Што уште би додал? Палетата на производи е широка. Ете прв на ум ми доаѓа хумусот. Сами го произведуваме, гледаме што повеќе работи сами да ги правиме. Набавуваме наут, го вариме, додаваме чисто природни зачини. Исто така, произведуваме и млеко од индиски орев, кое го користиме потоа во чиа пудинзите. Тука се и путерите кои веќе ги спомнавме. Начинот на употреба е разнолик: можете да ги јадете како прилог, да ги ставите во смуди – изборот е ваш. Сето тоа е богато со здрави масни киселини кои е пожелно да се внесуваат секојденвно. Уживаме во ова, работиме со мерак, сами си ги подготвуваме состојките и мислам дека тоа нè прави поразлични од сите други локали“.
МФ: Како сте задоволни од досегашната работа, каков е одзивот на скопјани? Дали има доволен интерес за овој вид на храна, или сепак повеќе се посетувани околните сендвичарници и бурекџилници?
„Дефинитивно скопјани стануваат сè повќе свесни за важноста од водење поздрав начин на живот и консумирање на поздрава храна. Но, според мене, сепак тука станува збор за фази во животот. Не можеш тинејџер да натераш да се храни стриктно со ваква храна, сепак, за жал, подостапни му се хамбургерите и сендвичите. Едукацијата е слаба на ова поле, децата и тинејџерите немаат доволно разбирање и поттик да почнат здраво да се хранат. Тука лежи една клучна поента, која би сакал да ја потенцирам. Имено, јас лично, би сакал да повлечам иницијатива, да се воведе едукација во училиштата, да почнат момците и девојките да ја разбираат потребата од внесување на храна полна со нутриенти и да почнат да го практикуваат тоа во своето секојдневие. Иницијативата има за цел да го опфати целокупниот школски систем, од градинка па натаму, барем еднаш во неделата дечињата да имаат допир со навистина здрави и вкусни оброци“.
МФ: Спомнавте едукација, дали имате воспоставено контакт со претставник на министерството за образование и наука како би пробале да им го понудите ова идејно решение?
„За жал, не! Тоа е сеуште само идеја која искрено се надевам дека еден ден ќе ја остварам. За сега ќе ги едуцираме скопјани и нивните заблуди околу исхраната. Знаете, сеуште постојат заблуди со кои самите себеси се лажеме – една од нив е онаа „нема врска, да се најадам јас квалитетно, да ме држи“ притоа јадејќи се што ни падне при рака. Но, таквата брза храна ниту ги обезбедува потребните нутриенти, ниту нѐ држи сити – напротив, нѐ прави поспани, без енергија, ни создава нелагодност во организмот. Нашите сограѓани не се доволно информирани, и пак ќе нагласам, клучниот збор е ЕДУКАЦИЈА!“
МФ: Кој е омилениот оброк на скопјани во зависност од тоа кој дел од денот е? Што сакаат да појадуваат, да ручаат и кои се најбараните јадења за вечера?
„Најпознати сме по пудинзите од чиа и по гранолата. Тие се нашите адути, без разлика за кој дел од денот зборуваме. Од другите работи доста се барани и ладните сендвичи со интегрално лепче, варени јајца и авокадо. Доколку некој не брза и има време да седне и да појадува, обично ги нарачуваат салатите. Имаме „енерџи“ салата, киноа салата, патем речено киноата исто така е многу здрава за организмот, тука е и хумусот кој има врвни нутритивни својства. Пополека луѓето осознаваат некои работи. Јас и мојата сопруга се храневме на овој начин 5-6 години и навлеговме скоро во сите тајни на ваквиот начин на исхрана. Не велам дека децата не треба да пробаат некоја кифла или нешто слично, секако дека понекогаш дури е и пожелно тоа да го сторат, но сепак приоритет и на децата, а пред сè на родителите треба да биде здравиот начин на исхрана. Не треба да чекаме да ни се случи некој здравствен проблем за да направиме измени во нашето дневно мени. Треба да го направиме тоа веднаш, за наше добро. Тренд во светот е да се намалува внесот на производи од животинско потекло, па треба и ние да бидеме во тек и да припазиме на она што го консумираме.“
МФ: Ни спомнавте проширување на бизнисот, на која друга локација ќе можат да ве најдат скопјани? Дали имате амбиции и за проширување надвор од Скопје?
„Да, наскоро отвараме нов угостителски објект во населба Аеродром. Станува збор за малку поозбилен концепт. Идејата ни е да направиме малку поозбилна приказна, бидејќи гледаме дека досега е ОК. Сакаме сето ова да го ставиме на хартија, да има систематизација и да го заштитиме концептот и брендот Љубовна Куќичка, како би можеле понатаму и франшиза да даваме. Многу луѓе ни бараат по другите градови и во странство, ете сега имаме луѓе од Шведска на кои им се допаднал концептот и сакаат да отвориме Љубовна Куќичка и кај нив. Истиот стил ќе биде запазен, истиот концепт, со тоа што ќе даваме франшиза за други места. Со тенденција сме да ги претставиме нашите путери на пошироката јавност, да почнеме да ги продаваме по маркетите, но не ние да ги произведуваме, туку во соработка со една поозбилна фабрика. Сето тоа ќе биде по наш рецепт, но бидејќи станува збор за масовно производство – приморани сме да соработуваме со поозбилни производствени погони. Значи, да сумираме: рецептот е ист, наше лого ќе имаат, наша етикета, само што ќе бидат произведени во фабрика.“
МФ: Ви посакуваме среќа Вам и на целиот тим на Љубовна Куќичка! Со нетрпение чекаме да направиме уште едно интервју во новиот локал. Ни беше вистинско задоволство што разменивме по некој збор!
Законски е забрането неовластено преземање на содржини од МојаФарма.мк без наведување на извор на информацијата, цитат и пренесување на линк до оригиналната страница. МојаФарма.мк може да покрене соодветна постапка за заштита на своите права пред надлежен орган.
