Започна откупот на тутунот од годинашната реколта, кој ќе се презема на 173 откупни пункта во државата. Вчера беа отворени 20 пункта од Прилепскиот тутунски комбинат, „Сокотаб” од Битола и „Алијанса” од Кавадарци.
Тутунарите очекуваат повисока цена, бидејќи, како што велат – квалитетот оваа година е добар. Годинава се склучени договори за околу 22.200 тони тутун.
Директорот на Државниот инспекторат за земјоделство, Зоран Шапуриќ, изјави дека од осумте регистрирани откупувачи досега 5 откупувачи обезбедиле финансиски средства за откуп на договорените количини на тутун.
– „Годинава се очекува да биде повисока просечна цена од минатата година со оглед на најавите дека квалитетот на тутунот е подобар од лани. ДИЗ за време на откупот постојано ќе биде присутен на терен и ќе врши надзор согласно законот“ – изјави Шапуриќ.
Откупот официјално ќе трае до 31 март наредната година.
