Иновативен македонски стартап: Работиме на машина за рециклирање на отпад од лозарство и овоштарство
Во Македонија постојат иновативни и храбри претприемачи кои го прифаќаат ризикот и се решаваат за сопствен стартап бизнис. Гоце Јоновски од Росоман, со компанијата ГОТЕХНИК, е еден од нив.
Неговата иновативна компанија тестира втор прототип на приклучна машина со контејнер за собирање и дробење на лозови и овоштарски гранки.
Целта на примена на овие приклучни машини е да се култивира отпадот кој понатаму може да се третира како енергенс – биомаса.
Примената на овие машини ќе значи социо-еколошки и економски придонес во општеството. Овој енергенс може да се користи во индустриска намена – когенерација, доработка на отпадот во производство на пелети и брикети како и во директна индивидуална примена за греење.
– Кажете ни нешто повеќе за оваа машина. Како работи, што е иновативно кај неа, и што овозможува?
Јоновски: Ова е приклучна машина која е од редот на дробилки за рециклирање на отпад, во случајот гранки од лозови и овошни насади. Се погонува од влечна машина – трактор и рециклирањето (дробењето) е непосредно на плантажите. Иновативноста на овој прототип е во самиот механизам за дробење, обликот, формата на ножевите и претставува подобрено техничко решение кое овозможува намалена потрошувачка на влезна енергија.
– Од каде идејата за неа, и колку време ја развивавте?
Јоновски: Идејата за создавање на машината доаѓа од примената на биомасата како енергенс, исто така од потребата да се рециклира овој вид на отпад, и поради заштита на животната средина. Користењето на биомасата е познато од многу одамна. Многу напредни општества ширум ЕУ па и во светски рамки имаат развиено системи за користење на овој енергенс, пред се во индустриска цел. Конкретно, овој прототип е креиран како 3Д модел од 2017 и физички изработен како прототип и во повеќе наврати тестиран.
– За кого е наменета оваа машина, кој може од неа да има корист?
Јоновски: Машината е наменета пред се за постоечките земјоделски стопанства кои можат најбрзо да се впуштат во овој процес на рециклирање бидејќи имаат влечна механизација и персонал. Како втора опција може да бидат новоосновани друштва кои би се занимавале исклучиво со оваа работа – рециклирање на отпад. Секако, потребно е да се воспостави систем на работа и примена на овој отпад (биомаса) за покрај еколошки аспект, да се воспостави и економски одржлив принцип на работа.
Бенефитот е економски, но и еколошката димензија е силно истакната. Токму тоа беше причина ФИТР да го поддржи овој проект.
– Што е потребно за негова помасовна примена?
Јоновски: Најпрвин треба да се препознае значењето од третирањето на овој отпад како од социо-еколошки така и од економски аспект, на индивидуална и колективна и општествена основа, и да се подготви проформа за интегриран пристап на дејствување и одржливост.
– Дали ваква машина има во регионов, и дали има извозен потенцијал?
Јоновски: Според моето сознание во регионот нема ваков вид на приклучна машина. На ниво на Европа постојат производители од Италија и Шпанија. Според мене, треба да се воспостави практика за користење и третирање на овој отпад, а паралелно машината да се понуди и надвор од Македонија.
– Кои се вашите очекувања на краток рок?
Јоновски: Очекувањата се дека ќе постигне консензус т.е интерес од третирање на овој отпад за јасно дефинирана цел, а со тоа и иницијално производство на овој тип машини
Разговараше: Христијан Станоевиќ
Законски е забрането неовластено преземање на содржини од МојаФарма.мк без наведување на извор на информацијата, цитат и пренесување на линк до оригиналната страница. МојаФарма.мк може да покрене соодветна постапка за заштита на своите права пред надлежен орган.
