Ширењето на шумските пожари во изминатите денови е една од најголемите природни катастрофи во последните години. Екстремно високите температури, неповолните временски услови, човечкиот фактор и за жал слабиот капацитет на државните институции овозможи беснеење на пожарите на северот, истокот и југот на земјата.
Додека со сите можни капацитети се води битка со огнената стихија, големи последици се очекуваат и врз многу земјоделци и фармери.
Најпрво тука се директните штети како опожарување на пчелни кошници, горење на насади и плевни, и најстрашното угинување на добиток.
Голем број на ветеринари ги ставија своите услуги на граѓаните од погодените подрачја низ земјата, како за нивните домашни миленици така и за добитокот кој е под ризик.
„Ветеринарната амбуланта Пет-Вет ве известува дека стои на располагање со бесплатна ветеринарна услуга за повредени миленици и диви животни во пожарите, и нашите клиенти од источниот дел на Македонија слободно можат да ги донесат во нашата амбуланта”, стои во објавите на скопската приватна ветеринарна ординација.
Влијанието на шумските пожари воопшто врз земјоделството е тешко да се процени бидејќи штетите може да бидат огромни. Исто така ризик има и по здравјето и животот на фармерите и земјоделските работници кои се ангажирани на отворено во непосредна близина на шумските пожари.
Најчесто проблемите се поврзани со ширењето на чад, хемиски испарувања и штетни честички кои може да ги загрозат дишните органи и сетилата. Затоа медицинските лица препорачуваат внимателност со работата на отворено во подрачје во кое се шири чад од шумски пожари, како и да се носи соодветна заштитна опрема.
Последици може да има и од загадувањето на водите како резултат на самите пожари со долготрајно влијание врз посевите.
Научниците и натаму се обидуваат да ги истражат врските помеѓу загадувањето на озонот и ширењето на штетни аеросоли од шумските пожари со долготрајните последици врз почвата, посевите и шумите и како да се најдат методи на опоравување.
Автор: Христијан Станоевиќ
Законски е забрането неовластено преземање на содржини од МојаФарма.мк без наведување на извор на информацијата, цитат и пренесување на линк до оригиналната страница. МојаФарма.мк може да покрене соодветна постапка за заштита на своите права пред надлежен орган.
