Николовски од Анкара: Обезбедуваме дополнителни количини вештачко ѓубре за земјоделците
Министерот за земјоделство, шумарство и водостопанство, Љупчо Николовски, оствари работна средба со Вахит Киришчи, министер за земјоделство и шумарство во Владата на Република Турција.
Двајцата министри ја потврдија досегашната трговска размена помеѓу двете пријателски земји и ги прецизираа идните активности во насока за зголемување на трговските капацитети и обезбедување на дополнителни количини на вештачки ѓубрива за нашите земјоделци.
Министрите на работниот состанок изразија заедничка согласност за реактивирање на земјоделската насочувачка комисија, која повеќе од 10 години не е во функција, а чија клучна цел е проширување на палетата производи за кои би имало намалување на царинските стапки од страна на двете земји.
На средбата министерот Николовски со својот турски колега Киришчи разговараше и за продолжување на соработката помеѓу двете држави околу моделот за осигурување на земјоделски поседи на којшто во моментов работи министерството за земјоделство, шумарство и водостопанство.
