Новиот министер за земјоделство на Германија, на својот прв ЕУ состанок ја потенцираше важноста од заштита на шумите
На своето прво присуство во Советот на Европа (Agrifish EU council), новиот министер за земјоделство на Германија, Џем Оздемир, се претстави како поборник за заштита на климата и благосостојба на животните додека министрите разговараа за мерките против уништувањето на шумите.
„Активното уништување на шумите е катастрофа и драматично ја забрзува климатската криза“, рече политичарот на Зелените на маргините на состанокот во понеделникот (13 декември), кој положи заклетва како министер една недела претходно.
На месечниот собир, министрите за земјоделство на ЕУ-27 разговараа за регулативата наменета за борба против уништувањето на шумите, што Европската комисија ја предложи во ноември. Оздемир силно се залагаше за предлогот на извршната власт на ЕУ, велејќи дека тој е усогласен со интересите на новата владина коалиција во Берлин.
„Не можеме да се ограничиме само на обидите за заштита на шумите во Германија, тоа мора да го направиме на глобално ниво ако сакаме да имаме шанса да се бориме со климатската криза“, рече тој.
Предлогот на Комисијата има за цел да ја намали потрошувачката на производи поврзани со уништувањето на шумите со условување на увозот на одредени производи, вклучително и земјоделски производи, како и со избегнување на уништување на шумите долж синџирот на снабдување.
Оздемир беше среќен што предложената регулатива „прави конекција помеѓу глобалното уништување на шумите од една страна и потрошувачката на земјоделски производи од друга страна“.
Во исто време, тој истакна дека гарантирањето дека постојните шуми ќе бидат зачувани треба да биде предуслов за секој меѓународен трговски договор што ЕУ ќе го постигне, вклучувајќи го на пример договорот МЕРКОСУР со јужноамериканските земји.
Први средби во Брисел
Патувањето во Брисел на состанокот на министрите за земјоделство на ЕУ беше прво патување на Оздемир откако ја презема функцијата – со што се потенцира „значењето што го има Европа за оваа политичка област што ми е доверена“, рече тој.
За време на престојот, тој имаше први средби и со комесарот за земјоделство Јануш Војчеховски и со комесарот за рибарство Вирџинијус Синкевичиус, како и со неговите француски колеги Жулиен Денорманди и Аник Жирарден, кои од јануари ќе го преземат претседавањето со Советот за земјоделство и рибарство.
Според Војчеховски, тој и Оздемир разговарале за тоа што подготвува новата германска владеачка коалиција за земјоделството, како и за националниот стратешки план на земјата за спроведување на реформираната Заедничка земјоделска политика (ЗЗП) на ЕУ.
На Твитер, комесарот ја поздрави силната поддршка од новата германска влада за амбициите на новата ЗЗП, велејќи дека споделува исти ставови на многу теми со министерот.
Оздемир, исто така, го истакна значењето на европската соработка со цел да се направи производството на храна поотпорно на кризи како што е Ковид-19 пандемијата.
„Токму во време на криза треба да дејствуваме на особено европски начин“, рече Оздемир, додавајќи дека ЕУ покажала „тимска работа и непоколебливост“ кога синџирите на снабдување биле загрозени од појавата на Корона вирусот.
За време на нивниот состанок, министрите усвоија план за итна реакција за да се обезбеди снабдување со храна во време на криза. Оздемир ја поздрави одлуката за институционализирање и блиска соработка во итни ситуации.
Покрај европската соработка, новиот министер на Зелените се потруди да се претстави и како првенец во битката за добросостојба на животните. „Ако некој бара право да користи животни, тогаш има и обврска да ги заштити на најдобар можен начин“, рече тој.
Оздемир укажа на неговата инаугуративна изјава, каде што вети дека ќе биде главен застапник за благосостојбата на животните во Германија. Во исто време, за време на церемонијата на инаугурација во Берлин, тој воедно се прогласи и за застапник на земјоделците.
За справување со овие два аспекти, акцијата на ниво на ЕУ ќе биде од клучно значење, рече Оздемир во изјавата на Советот. „Политичката рамка за ова често се поставува во Брисел“, рече тој, додавајќи дека целта на Германија ќе биде да го трасира патот на ниво на ЕУ и да ги усогласи различните интереси.
Извор: EURACTIV
