Што е функционална храна и зошто се препорачува за одржување на здравиот организам?
Поимот функционална храна се однесува на намирници кои со долгорочно консумирање може превентивно или терапевтски да влијаат врз одредени аспекти на човековото здравје.
Јапонија е првата земја која ја призна функционалноста на храната. Оваа храна честопати може, повеќе или помалку, да биде замена за скапите лекови, кои го носат ризикот за појава на различни нус појави. Првиот сертификат за класификација на некоја храна во групата на функционална храна е FOSHU (Foods for Specified Health Use – храна за посебна здравствена употреба). Овие сертификати денеска ги издава јапонското Министерство за здравство. Во Јапонија постојат повеќе од 100 видови на функционална храна за кои се издадени дозволи и препораки.
Функционалната храна е создадена преку постепено препознавање на здравствените придобивки од консумирање на храна која позитивно влијае врз регулирањето на метаболизмот и здравјето. Овие видови на храна имаат позитивно влијание врз здравјето, физичките перформанси или менталните способности на поединецот. Продуктите имаат хранлива вредност и дополнително се збогатени со состојки кои се корисни за здравјето. Бројот на видовите на функционална храна постојано се зголемува. Тоа најчесто се прави со додавање на една компонента карактеристична за определениот продукт (пр. млеко збогатено со калциум).
Извор: Pixabay
Функционалната храна е храна која е добиена од природни состојки. Тоа е храна збогатена со витамини, минерали, пробиотици или влакна. За функционална храна се смета: овошје, зеленчук, ореви, семиња и житарки богати со хранливи материи. Познат пример за функционална храна е овесната каша, бидејќи содржи растворливи влакна што можат да помогнат во намалувањето на нивото на холестерол.
Функционалната храна сама по себе не лечи или спречува болести. Функционалната храна мора да се гледа како додаток на здравиот начин на исхрана за да се оптимизираат нејзините придобивки.
Најдобрите 7 функционални намирници:
1. Јајца збогатени со Омега-3
Омега-3 киселините позитивно влијаат во намалување на триглицеридите, холестеролот и во намалување на ризикот од срцеви болести. Јајцата збогатени со Омега-3 имаат неколку пати подобри нутритивни вредности од обичното јајце.
Извор: Pixabay
2. Овес
Во својот состав содржи бета-глукани (диетални влакна) и фитохемикалии (биоактивни растителни компоненти). Овие нутриенси помагаат во намалување на вкупниот и ЛДЛ холестеролот, а може да помогнат и во намалувањето на крвниот притисок.
Извор: Pixabay
3. Масна риба
Омега-3 масни киселини (DHA и EPA) кои ги има во лосос, туна, сардини, пастрмка и др.
Извор: Pixabay
4. Домати и производи од домати
Функционална компонента на доматот е ликопен, антиоксиданс кој помага во борбата против срцевите заболувања и позитивно влијае врз целиот имунолошки систем. Липкопенот има важна улога во развојот и одржувањето на здрави коски. Може да го има во свежи или конзервирани домати, мелени домати, доматно пире, супа од домати и салса.
Извор: Pixabay
5. Пробиотици
Добрите бактерии – лактобацилус, го поддржуваат здравјето на дигестивниот систем и го зајакнуваат имунитетот. Најдобар извор на пробиотици се јогуртите дополнети со пробиотици ферментиран зеленчук и ферментирани производи од соја.
Извор: Pixabay
6. Јаткасти плодови
Јаткастите плодови содржат мононезаситени масни киселини или т.н. здрави масти и големи количини на антиоксидансот – витамин Е. Може да го намалат ризикот од коронарна срцева болест. Ги има во ореви, бадеми, ф’стаци, кикирики, индиски ореви, лешници, костени и бразилски ореви.
Извор: Pixabay
7. Сок од грозје или црвено вино
Големите количини на антиоксидансот ресвератрол се концентрирани во лушпата на црното грозје. Со своите антивоспалителни и антиоксидантни својства помага во исфрлање на штетните материи од телото и има позитивни ефекти за здравјето на срцето. Најголеми бенифити има ако се конзумира во 100% сок од грозје.
Извор: Pixabay
Фото: Pixabay
