Урбани момци, во рурално опкружување – Фарма Зрзе, инспиративна фармерска приказна на браќата Шемкоски од Скопје
МФ: Која е приказната позади фармата Зрзе? Кој беше мотивот да го напуштите урбаниот живот и да одлучите да станете професионални фармери? Од каде почнавте и како дојдовте до ова што го имате денес?
– Нашата приказна е прилично едноставна. Двајца браќа, уморни од лутање низ светот и работењето секаков вид професии, решаваат да ги спојат своите таленти и да создадат нешто што е „кул“, но во исто време ќе има како да хранат семејства со здрава и еколошка храна. Гледајќи на модерното време и како животот се движи со забрзано темпо, решивме малку да подзастанеме и да дигнеме глава од хаотичниот начин на живот кој го наметнува модерното општество.
Двајцата по природа сме различни карактери, интереси и слично, но со заедничка цел. Претходно сме работеле на многу заеднички проекти и сме делеле исти работни места и тоа ни помогна да научиме да функционираме како швајцарски часовник, секој со своите таленти да придонесува најдобро што може таму каде што е најкорисен. Фарма Зрзе е приказна за двајца браќа кои се решија да креираат зелена иднина од која сите ние ќе имаме корист, но и која ќе ги подучува и инспирира и другите да живеат во склад со природните закони.
МФ: Со каков тип на предизвици (финансии, пазари, дистрибуција, работна сила) се соочувавте во процесот на развојот на вашата фарма? Што е различно денес во однос на она на почетокот?
– Одлично прашање! Сметаме дека во секоја професија постојат предизвици. И тоа е добро, бидејќи на тој начин растеме, нели? Како и сите оние кои започнуваат со нешто ново, така и нас не нѐ одминаа почетните грешки и лекции. Многу работи што ги учевме на Јутјуб немаа врска со реалноста и тука многу грешевме.
Меѓутоа, научивме дека најдобро е да учиме преку практична примена во опкружувањето во кое моментално функционираме, луѓето со кои соработуваме и личното искуство со фармерскиот начин на живот. Интересно е, бидејќи сме прилично оптимистички настроени и сакаме континуирано да се надоградуваме и да научиме нешто ново секој ден. Многу сме благодарни што ја имаме таа среќа да работиме со вистинските соработници и ментори кои секојдневно ни помагаат во развојот на нашата фарма.
МФ: Дали во Македонија постојат доволно добро услови за реализација на вакви ентузијастички фармерски проекти? Што би им препорачале на младите кои се полни со идеи во областа на земјоделството но не веруваат дека истите може да ги реализираат и во Македонија?
– Се водиме пред сѐ од народна изрека која вели „има работа за секој што сака да работи“. Во денешниот модерен свет, сите сме на некој начин поврзани. Сеедно дали се наоѓате во некое зафрлено село или на „руфтоп“ во строгиот центар, ако сте добри во тоа што го правите, можете да поместите планини за да ве најдат, каде и да се наоѓате.
Значи, не е пресудно каде се наоѓате и дали е добра локацијата. Луѓето кои бараат квалитет, лесно ќе го препознаат тоа во вас доколку го нудите. Многу е важно да бидете во тек со модерниот начин на фармерско работење. Пример, континуирано да наоѓате нови пристапи во работењето, иновирање на нови производи, отвореност кон потрошувачите и континуирано одржување на високи стандарди на работење.
Според нас, Македонија е идеална за фармерите. Имаме прекрасна природа, реки, езера, извори, вегетација и слично. Македонија е богата земјоделска земја во која можат да се остварат сите идеи во индустријата на храна за кои има побарувачка. На младите им препорачуваме да се занимаваат со она што го сакаат и љубат. Ако се искрени и има побарувачка за нивните производи, тогаш не гледаме причина нивните идеи и желби да не се реализираат. Најбитно е да не го гледаат фармерството само како начин на заработка, туку и да го живеат стилот во согласност со своите автентични идеи. Само така ќе ја пронајдете вистинската среќа и кариера.
МФ: Дали сметате дека програмите за поддршка на земјоделството од страна на државата се доволни за развој и одржување на концепти на фарма како вашата фарма? Што би им препорачале на креаторите на овие политики?
– Во овој дел сме задоволни. Поддршката е добра бидејќи нудат шанса на оние кои сакаат да се занимаваат со оваа дејност. Сметаме дека државата одлично си ја работи својата работа и сме многу благодарни што е тоа така. Сепак, не мора да значи дека треба да чекаме и од други да ја завршат нашата работа. Ако си ги засукаме ракавите и работиме без оглед на тоа дали сме добиле поддршка од некого или не, тогаш не гледаме причина зошто тоа би ги попречиле оние кои сакаат да се занимаваат со фармерство. Треба секогаш да сме проактивни, без разлика на околностите. Само така ќе создадеме успех со кој посебно ќе се гордееме.
МФ: Што го сочинува профилот на призводи на фармата Зрзе и кон каков тип на пазар сте насочени?
– Засега, од нашата палета на производи издвојуваме, јајца од отворени пасишта (кокошки кои слободно пасат на ливади), домашни јуфки, лимитирани количини на планински мед и се надеваме наскоро, јајца од препелица и патки.
МФ: Во кој правец имате желба да се развивате во иднина? Што е следно што може да очекуваат вашите клиенти?
– Засега, сакаме да продолжиме да ги учиме тајните на овој занает. Сакаме сѐ што правиме да биде со наша „штампа“. Односно, да бидеме сѐ подобри и подобри и нашиот бренд да биде синоним за нешто што е изработено со врвен квалитет и со огромна посветеност во работата, бидејќи така сме научени од мали нозе во системот во кој се калемевме.
Воедно сакаме и да го промовираме селскиот начин на живот. Да не бидеме само фарма која исклучиво продава производи, туку и да ја покажеме и другата страна на нашиот животен стил и еден ден да почнеме да организираме отворени денови каде што туристите ќе имаат можност да се едуцираат повеќе на оваа тема, да пробаат од нашите производи, како и да го доживеат фармерското искуство од прва рака.
Сакаме нашата приказна да биде и нивна, да споделуваме моменти од нашиот живот, да документираме тоа што ние на фармата го доживуваме, да инспирираме нови генерации, да создаваме зелена иднина и да шириме позитивна енергија!
Законски е забрането неовластено преземање на содржини од МојаФарма.мк без наведување на извор на информацијата, цитат и пренесување на линк до оригиналната страница. МојаФарма.мк може да покрене соодветна постапка за заштита на своите права пред надлежен орган.
